Kumtin kan hman thin Group Nite chu Zosapthara Group ten kum 2018 Group Champion an nih angin an hmang a, Group Leader - Pu PS Lalhuthanga'n hnehsawh takin a kaihruai a, Tv R. Lalnunthara'n tanna hun hmangin Group Champion ten Opening Song sain Group Nite hawnna an neih hnuah Group Nite Programme hlimawm tak hman tan a ni.
Branch Leader Pu R. Zoremsanga hnen atangin thusawi tawi ngaihthlak a ni a, hemi hnu hian Branch Secretary Report leh Group Secretary Report ngaihthlak chhunzawm a ni a, Nl Lalrengliani hnen atangin Solo ngaihthlak a ni bawk.
Hemi zawh hian KTP Inleng Editorial Board ten hun an rawn hmang a, kum 2018 report an pek bakah kum 2018 chhunga KTP Inleng Agent te hnenah lawmman semna an nei nghal bawk. Duet sawm chhunzawm an ni a, zai kan ngaithla dawn emaw tih laiin Duet hi an Band hming zawk a lo ni a, zaiah Magic mak lo tak tak nuihtiza si Duet Band te hnen atangin kan en ho.
Group tin atangin Special Item pakhat theuh neih turah Pu Buanga Group ten Special Item an present hmasa ber a, Group Leader Pu Johny R. Malsawmtluanga Special Item a rawn present a, hemi zawh hian Junior KTP ten lam mawi tak an rawn present leh bawk a. Branch Asst. Leader Pu PC Remmuanpuia Special Item nei tura sawmzui leh niin a ni Online-a a thil chahsual rawn zuar chhawng hmasain Special Item hlimawm tak a rawn present leh bawk a ni.
Hemi zawh hian Branch Treasurer Tv Ngurnuntluangan special item a rawn nei leh a, mi tawi langsar zual thlankhawmte hruia chhang khai a ineisiak tir a, ennawm leh nuihtiza tak a ni. (Video a lak a nih avangin a lem erawh an nei ve ta lo :-) Zosapthara Group leh Zosaphluia Group ten Special Item atan Duet ve ve an rawn theh chhuak a, Camera Battery Low avangin thlalak an nei ve ta lo a ni. Hemi hnu hian Tv H. Lalthazuala Solo tura sawm a ni a, koh chawp dawl takin mawi takin Pathian fakna hla a rawn hlan leh bawk.
Hemi hnu hian Gift Exchange neih a ni a, Gift Exchange zawh hian Thingpui inho pahin kan Branch thlalak thenkhat Projector hmanga en ho leh a ni a, hlim takin Group Nite 2018 chu kan hmangzo ta a ni.
GIFT EXCHANGE
Comments
Post a Comment